Суратда: Жадидлар, 1920 йил.
Муаллиф: Дамир Сатторов
Жадидлар XIX аср охири – XX аср бошида Россия империясида мусулмон модернист ислоҳотчилари бўлган. Улар ўзини “тараққийпарвар”, “зиёли” ёки фақат “Ёшлар” деб атаган кишилар эди. Гарчи ҳаракат ичида жиддий мафкуравий келишмовчиликлар бўлган бўлса-да, жадидлар аксил-клерикал ҳаракат бўлган, таълим соҳасини ислоҳ қилиш ҳамда мактабларда “усул ул-жадид” ёки “янги усул”ни татбиқ қилиш ва ривожлантиришга интилган. Умуман олганда, уламо ва ислом руҳонийларига қарши муваффақиятли кураша олган бўлса-да, улар ҳам совет давлатининг қурбони бўлди. Жадидлар маҳаллий буржуазия ва аксил-инқилобий гумашталар сифатида қораланди ва кўпчилиги отиб ташланди.
Ўзбек тарихчиси Дилором Алимова жадидлар тарихи, ғоялари ва энг ёрқин вакиллари, хатолари ва ютуқлари ҳақида ҳикоя қилади.
Дилором Аъзамовна Алимова — тарих фанлари доктори (1991), профессор (2001), тарих фани назарияси ва методологияси, маданиятшунослик ва тарихшунослик муаммолари, Ўзбекистон давлатчилиги тарихи, Ўрта Осиёдаги “аёллар масаласи”, шунингдек, Ўзбекистон ва Марказий Осиё тарихининг турли жиҳатлари бўйича етакчи тадқиқотчи (Википедия).
Жадидчилик келиб чиқишига сабаб бўлган омиллар ҳақида гапириб берсангиз. Ушбу ташаббускорлар пайдо бўлган тарихий шароит қандай эди? Бу тарихда қайси давр бўлган?
Жадидлар ким бўлганини тушуниб олиш учун ўша давр тарихини жуда яхши билиш зарур. Жадидчилик XIX аср охири – XX аср бошида пайдо бўлди. Агар биз жадидчилик пайдо бўлишининг тарихий сабабларини тушунишни истасак, тарихга бирох чуқурроқ кириб боришимиз, XIX асрдаги фалсафа ва маърифатнинг кучайиши, қанчалик ғайритабиий кўринмасин, Ўрта Осиё хонликларининг XVI асрда Буюк ипак йўли заифлашиб қолгани билан боғлиқ тарзда юзага келган қолоқлиги объектив сабабларини англаб олишимиз керак бўлади. Ўша вақтда денгиз йўллари очилиб, Ғарбда, Европада технологиялар жадал ривожлана бошлади. Субъектив сабаблар эса халқ хўжалиги ва умумий ривожланишга улкан зарар етказган ички урушлардир.
Туркистонни Россия империяси босиб олгандан кейин ўлка метрополияни табиий бойликлари, хусусан, пахта ва ипак билан беғараз таъминлаб турган хомашё базасига айланди. Кейинчалик бошқа табиий ресурсларни ҳам қазиб олиш ва марказга ҳайдаб бериш дастури ишлаб чиқилди, фақат ушбу мақсадларга эришишда хизмат қилувчи соҳалар ривожлантирилди. Рус сармоясининг Туркистонга кириб келиши, албатта, банклар ривожланиши, темирйўллар қурилишига туртки берди, аммо судхўрлик капиталининг ривожланишидан синган деҳқонлар сонини жиддий тарзда ошириб юборди. Бунга мана бундай рақамлар мисол бўла олади: 1912 йил ноябрига келиб, аҳолининг қарз берувчи ташкилотлар олдидаги қарзи 157 миллион рублга етди. 1917 йилга келиб, Фарғона вилоятининг айрим уездлари – туманларида ерсизлар 30 фоизга, Андижон вилоятида эса 50 фоизга етди. Туркистондаги аҳвол қандай бўлганини шу рақамлардан ҳам билиб олса бўлади. Шу билан бирга, маданий инқироз, бутунлай сафсатага айланиб қолган таълимнинг аҳволи ҳақида ҳам гапиришга тўғри келади. Умуман, бу даврга келиб, ислом фалсафаси қадрини йўқотиб бўлди, яъни у содир бўлаётган воқеа-ҳодисаларнинг уламо тарафидан маиший талқинига айланиб қолди, холос.
Шунинг учун жадидлар – ёшлар, бу эса ёшлар ҳаракати эди. Мен жадидларнинг ёш таркибини ўргандим. Маълум бўлишича, машҳур жадид ва ёшларнинг севимли ёзувчиси Чўлпон 1910 йилда 13 ёшда, Беҳбудийнинг ёши эса 30 ошиқроқ бўлган экан. Ўша ҳаракат иштирокчилари фақат ёшлардан иборат экани маълум бўляпти. Айни масалага ёнгдашилганда, шундан келиб чиқиш керак бўлади. Бу ёшлар интеллектуал жиҳатдан ривожланган ва Туркистоннинг жаҳон тараққиётидан орқада қолаётгани сабабларини тушунар эди. Шу ўринда қайд этиш жоизки, маърифатпарварликнинг чуқур илдизлари бўлиб, фақат жадидчилик кўринишида зуҳур бўлгани йўқ. Унинг маърифатпарварлик илдизлари ҳам бор эди ва жадидчилик ушбу ҳаракатнинг аккумулятори – қувват йиғувчиси бўлди. Албатта, у олдинги адабиёт, олдинги фалсафа ютуқларига асосланган. Жадидлар ўзини ушбу фалсафанинг таҳлилчилари сифатида ҳам намоён қилди. Биламизки, машҳур маърифатпарвар Аҳмад Дониш, шоирлар Муқимий, Фурқат, Ҳамза, Убайдулла Завқий, Муҳаммад Баёний, Абай Қўнонбоев ва олим Чўқон Валихонов ислоҳотнинг ҳассос тарафдорлари бўлган, улар боши берк кўчадан чиқишни нафақат маърифатда, қолаверса, туркий халқлар бирлигида кўрган. Ўтмишдошларидан анча олдинлаб кетган ва маърифатпарварликдан сиёсатга ўтган жадидлар шу заминда униб чиққан.
Биз жадидлар ҳаракатини феномен деб атаймиз, тўғрими? Агар улар мавжудлиги жуда оз вақт оралиғи ва муайян сиёсий воқеалар билан чекланмаганда, мен буни кичик Ренессанс деб атаган бўлар эдим. Агар жадидлар фаолиятини яна бир неча ўн йил давом эттирганида, жуда яхши натижага эришган ҳамда аҳоли уларни яхши қабул қилган, ғоялари яхши тарқалган бўлар эди. Жадидчиликнинг ўзига хослиги нимада? Энг аввало, уларнинг ақл-заковати фавқулодда юксак ривожланган, ҳам Шарқ, ҳам Ғарб маданияти ҳақида муайян билимга эга бўлган. Деярли барчаси олий диний таълим олиб, Навоий, Жомий, Фузулий шеърияти, ўрта асрларда яратилган фалсафий рисолаларни ўқиб ва уқиб, бу билимини ҳам Шарқ, ҳам Ғарб маданияти ютуқлари билан бойитган. Айни ҳол жадидларнинг фалсафий дунёқарашини белгилиб берган ва бу таълим соҳасини, умуман олганда, маърифатни ислоҳ қилиш борасидаги фаолиятида акс этган. Жадидлар нафақат бундай ислоҳот ўтказишни назарий жиҳатдан асослаб берган, қолаверса, маърифатни амалга ошириш учун амалда ҳам тинмай ҳаракат қилган: улар янги усулдаги мактаблар, кутубхоналар, қироатхоналар очган, дарсликлар, газеталар чоп этган, илк театр ташкил этган, бу аҳоли учун кўз кўриб, қулоқ эшитмаган янгилик бўлиб, жуда катта таъсир кучига бўлган ва одамлар онгида инқилоб ясаган. Шу ўринда М. Беҳбудийнинг “Падаркуш” пиесасини эслаб ўтиш жоиз, унда билимсизлик, жоҳиллик фожиага сабаб бўлиши кўрсатиб берилган ва ёшлар онгида чин маънодаги инқилоб ясаган эди.
Совет тарихшунослигида Қримда истиқомат қилган Исмоил Гаспринскийни жадидчилик асосчиси деб ҳисобланади. У киши ҳақида сўзлаб берсангиз. Бу жадиднинг асосий ғоялари нималар бўлган ва нега ўша ғоялар Россия империясииннг айнан Марказий Осиё қисмида бунчалик яхши кутиб олинган?
Ҳа, Исмоил Гаспринский – жадидчиликнинг отаси, чунки у маърифатпарварлик фаолиятини Қримда бошлаб, шу билан чекланиб қолгани йўқ ҳамда “Вақт” ва “Шўро” деб аталган 2 та буюк газета ташкил қилган. Бу газеталар Қримдан ташқарида ҳам кенг тарқалди. Ўша газеталар таъсири жуда катта бўлган – у Марказий Осиё зиёлилари учун чин маънодаги кашфиёт эди, чунки газетада нафақат бошқа давлатлар, мамлакатлар ва шаҳарлар тараққиёти, шунинг баробарида янги усул мактабларининг аҳамияти хусусида ахборот берилган, уларда туркий халқларнинг сиёсий эмас, маънавий жиҳатдан бирлашиши зарурлиги бот-бот такрорланган. Шунинг учун газета сонлари бу ерга олиб келинадиган бўлди. Ўрта Осиё жадидчилиги отаси деб тан олинган Маҳмудхўжа Беҳбудий 1903 йилда иккинчи марта қилган ҳажини Россияни, хусусан, бошқа Шарқ мамлакатларини ўрганиш билан омухта қилди ва ўша йили Исмоил Гаспринский билан учрашди. Бу пайтга келиб, Беҳбудийнинг ўз маблағи ҳисобига очилган кўплаб хусусий мактаблари бор эди. У “Самарқанд” деб аталган газета чоп эттирган. Гаспринский билан суҳбати олимни тўғри йўлдан кетаётганига ишонтирди ва шу йўлдаги бундан кейинги ҳаракатини тўғрилаб олди. Шу сабабли Гаспринскийни Марказий Осиёда ҳам ушбу ҳаракатнинг раҳнамоси деб аташ мумкин.
Унинг таъсири жуда катта бўлган. Гаспринский Бухорога келгани, ушбу шаҳрдаги жадидлар мактабига боргани, ҳатто амир билан бундай мактабларнинг фойдаси ва амир ушбу мактаблар ривожланишига ёрдам бериши зарурлиги ҳақида гаплашгани маълум. Лекин, таассуфки, бундай бўлмади. Амир фармони билан бу мактаблар ҳам, очилган бошқалари ҳам ёпилди. Лекин бу энди бутунлай бошқа – Бухоро жадидчилиги тарихи.
Эслатиб ўтганимиздек, Россия империясииннг Ўрта Осиё қисмида жадидлар ҳаракати жадал ривожланди. Бу ерда Беҳбудий, Фитрат ва бошқа етакчилар етишиб чиқди. Айни чоқда Ўрта Осиё жадидчилигини Бухоро ва Хива жадидчилигига бўлиш урф бўлган. Ўша даврда Қозоғистонда “Алаш” ҳаракати ривожланган, у ҳам модернистлар ҳаракати, ҳатто жадидчилик ҳаракати деб аталган. Туркистонда шунга ўхшаш “Шўрои ислом” ҳаракати ривожланган ва унга ўзбек маърифатпарвари Мунавварқори Абдурашидхонов етакчилик қилган, унинг фаолларидан бири жамоат арбоби Мустафо Чўқай бўлган. Жадидчиликнинг ушбу минтақавий бўлинмалари қайси жиҳатдан ўзаро ўхшаш ва қайси жиҳатлари ўзаро фарқли бўлган?
Биласизми, агар уларни таққослайдиган бўлсак, сиёсий вазият ва давлатнинг сиёсий қурилмасини ҳисобга олишимиз шарт бўлади. Масалан, Бухорода жадидчилик қувғинга учраган. Бу амирнинг ҳеч қандай янгиликни истамаслиги билан боғлиқ эди. Хива хонлиги ҳақида бундай деб бўлмайди, чунки Хива хони Муҳаммад Раҳим – Феруз тахаллуси билан шеърлар ёзган – маърифатли инсон бўлган. Унинг шарофати билан илк босмахона Россияда сотиб олиниб, Хивага олиб келинган, биринчи жадидлар мактаби, ҳатто қиз болалар учун жадидлар мактаби очилган. Яна Хива хони вазири Исломхўжанинг ушбу ҳаракатда ҳомий сифатида қилган ишларини алоҳида таъкидлаб ўтиш лозим, чунки у “усул ул-жадид” мактабларини ривожлантиришга ҳар томонлама ёрдам берган ва бундай мактаблар аҳамиятини тушунган. Зикр этилган барча минтақалардаги мактабларни бирлаштириб турган нарса шуки, жадидлар ўз маданияти билан чекланиб қолмасликни, халқ қолоқ бўлиб қолгани сабаби Ғарбнинг технологик ютуқларини жалб этишни хуш кўрмаслик эканини яхши англаган.
Кўпчилик жадидларни ғарбпарастликда айблаган. Мен ушбу мавзуда алоҳида мақола ҳам ёзган эдим. Улар ғарбпарастлигини тушунса бўлади. Бу нафақат жадидлар фалсафасига, балки ташқи кўринишига ҳам таъсир кўрсатган. Улар ҳатто европаликларга ўхшаб кийиниб, чармдан тикилган пойабзал кийиб юрар, сўнгра муллалар жадидларни чўчқа терисидан тикилган оёқ кийим кийганликда айблар, лекин улар бунга парво қилмас эди. Жадидлар, агар биз Ғарбнинг маданий ва технологик ютуқларини билмасак, келажагимиз барбод бўлади, деб ҳисоблаган.
Туркистон ҳақида нима дейиш мумкин? Бу ерда Россияда юз берган жараёнларнинг турткиси кучли бўлди ҳамда Эрон, Хитой ва Ҳиндистондаги инқилоблар қаттиқ таъсир кўрсатди. Биз 2004 йилда “Жанубнинг ёшлар ҳаракати” деган мавзуда – яъни сайёрамиз жанубига бағишлаб – халқаро конференция ўтказдик. Маълум бўлишича, Осиёнинг барча мамлакатларида ўша вақтда ривожланган ҳаракатлар бўлган экан. Бу ўринда ўзаро таъсирлашув ҳақида гапирмаслик мумкин эмас. Мен Эрон, Ҳиндистон, Хитой ва Россияни тилга олиб ўтдим, албатта, Марказий Осиёдаги алоқалар жуда қалин бўлган. Алаш-Ўрда Республикаси Туркистон Мухторияти деб аталган республика ташкил этилиши билан параллел равишда кечди, уни тарихшуносликка оид адабиётларда Қўқон Мухторияти деб аташ расм бўлган. Декларацияга ва Лениннинг халқларларнинг ўз тақдирини ўзи белгилаши тўғрисидаги декретига ишонган жадидлар ва тарафдорлари Қўқон шаҳрида – Тошкент қизил армия аскарлари билан тўлиб-тошган эди – Россия Федератив Республикаси таркибида мустақил республика ташкил қилди. Улар ўша пайтда Россия таркибидан чиқиш мумкин эмаслигини, Россиясиз ҳалокатга маҳкум бўлишини тушунган. Бироқ шу билан бирга ўзига хосликлар – тараққиётнинг миллий ўзига хосликларини ҳисобга олган ҳолда мухторият талаб қилган. Айни ҳолат Алаш-Ўрдада ҳам юз берган, хусусан, Мустафо Чўқай мана шу республиканинг биринчи ҳукумати раиси бўлган – бу зикр этилган ҳаракатлар ўртасидаги алоқалар қалин бўлганини кўрсатади. Озарбайжонда ҳам Озарбайжон Республикаси ташкил этилгани эълон қилинди, бу Бошқирдистонда ҳам юз берди. Ушбу ҳолат Малайзия, Ҳиндистон ва бошқа кўплаб Осиё мамлакатларида ҳам содир бўлди. Лекин пировардида болшевиклар ҳукумати бу республикаларни йўқ қилди.
Муҳокама қилиб ўтганимиздек, жадидларни клерикал консерватизмга қарши кураш бирлаштирган, лекин улар ҳаммаси диндор кишилар бўлган. Жадидлар муҳитида исломни ислоҳ қилиш бўйича айланиб юрган ғоялар ҳақида гапириб берсангиз.
Бу ерда яна гапни узоқдан бошлашга тўғри келади. Россия империяси минтақани босиб олгандан, бу ерга Россия сармояси кириб келгандан сўнг Туркистоннинг жадал тарзда метрополия хомашё базасига айлантирилиши маиший ҳаёт ва ҳуқуқий меъёрлар ўзгартирилишини талаб этиши муқаррар эди. Бу жараён оғир бўлган, чунки бундай вазият янгиликларга нисбатан турлича, аксарият ҳолларда салбий муносабатни келтириб чиқарган. Ислом динининг догматик фикҳ тизими шу тарзда тузилган эдики, унга кўра, ўша тизимни тамсил этувчи кишилар ҳар қандай янгилик – бидъатга тегишли баҳо бериши, ўша янгилик қабул қилса бўладиган ва яхши ёки қабул қилса бўлмайдиган, шубҳали, ёки маълум шартлар билан тан олиниши керак бўлган. Аниқроқ қилиб айтадиган бўлсак, янгиликка илоҳиётшунослик нуқтаи назаридан баҳо берилиши алоҳида долзарблик касб этган, айни баҳо мусулмонларнинг янги жараёнларда қатнашишини оқлашга, уларга ижозат этилишига имкон берган. Буни амалга ошириш учун аввало бошқа динларга нисбатан бағрикенгликни шакллантириш зарур эди, чунки барча янгиликларга оддий халқ тилида кофирлар деб аталган бошқа динлар вакиллари: христианлар, яҳудийлар ва ҳк. ишлаб чиқарган нарсалар сифатида қаралган.
Яъниким, Россиядан олиб келинган босмахона, босмахона станоги ёки мусиқа граммофони ва яна бошқа нарсаларни олайлик. Албатта, мусулмонлар буларга кофирлар, яъни христианлар ишлаб чиқарган нарса деб қараган, улардан фойдаланиш керакми ёки йўқлигини, дин бу масалага қандай қарашини билмаган. Туркистониннг миллий тараққийпарварлари ушбу диний бағрикенгликнинг чин маънодаги ифодачилари эди. Уларнинг диний билими, дунёқараши ва интилишлари билан бунга тўла ҳаққи бўлган. Сиз тўғри айтганингиздек, уларнинг машҳур вакиллари нафақат мадрасаларни тугатган, қолаверса, диний рутбага ҳам эга бўлган. Масалан, Маҳмудхўжа Беҳбудий ота-бобосидан муфтийликни мерос қилиб олган ва вақтида Самарқанд вилоятида ушбу лавозимни эгаллаган. Мунавварқори мадрасини тугаллагандан сўнг Тошкентдаги “Дархон” масжидида имом бўлиб ишлаган, Исҳоқхон Ибрат эса Наманган вилоятининг Тўрақўрғон туманида қозилик қилган.
Ўтмишнинг маданий капиталига, саёҳат қилиш, Европа, шунингдек, ривожланган мусулмон мамлакатларининг саноат ва маданият соҳасидаги ютуқлари, турли зиёлилар ва ҳар хил ижтимоий ҳаракатлар вакиллари билан танишиш имкониятига эга бўлган жадидлар Туркистон қанчалик тараққиётдан ортда қолиб кетганини жуда яхши англаётган эди. Шунинг учун Ўрта Осиёнинг мусулмон маданий анъанасини модернизация қилишни ёқлаб чиқа бошлади. Улар ислоҳотни ислом таълимотини англаб етишдан бошлади. Шу сабаб Қуръон ва ҳадислардан ҳамма нарса билимга таянишини тасдиқловчи ўринларни излашга тушди. Биламизки, Қуръоннинг ¼ қисми тарихга бағишланган, бутун бошли тарих эса ўтмишнинг интеллектуал тажрибасини тушунмай туриб, жаҳон интеллектуал тажрибасини англаб олмай туриб, бирор нарсага эришиб бўлмаслигидан далолат беради. Америкалик тарихчи Адиб Холид фикрича, Ўрта Осиё жадидчилиги мусулмон модернизми чорчўплари билан маҳаллийлаштирилган эди.
Биз жадидчиликни мусулмон модернизми деб аташимиз мумкинми? Бу саволга қисман “ҳа” деб жавоб берса ҳам бўлади, чунки улар фаолиятининг анча-мунча қисми аҳолига Аллоҳ бандасига “ўқи” деб айтганини исботлашдан иборат бўлган. Қуръонда, “Илмни Чинда (Хитойда) бўлса ҳам ўрганинглар”, дейилганини биламиз[1]. Унинг риторик тузилмаси илдизлари Ўрта Осиёнинг мусулмон анъанасига бориб тақалади, шунинг учун жадидлар, анъанага кўра, ислом динига таянган. Замонавийлик ислом динининг ҳақиқий мазмунига боғланган, фақат барча асрлар давомида пайдо бўлган ўсимталаридан тозаланган ислом мусулмонлар фаровонлигини таъминлаши мумкин эди. Жадидларнинг ғояси шу бўлган. Дунёга янгича назар билан боқар экан, исломни тушунди, мусулмонлик нима эканини англади. Уларнинг жамиятни янгилаш назариясида тараққиётда жуда олдинлаб кетган Европа билан яқинлашиш, энг яхши ютуқларини ўзлаштириш ҳақидаги масала жиддий ўрин тутган. Исломни оқламасдан бунинг иложи йўқ эди. Туркистоннинг мустамлакадаги ҳолати сабаб бўлган инқирозли вазиятдан чиқиш энг аввало Европа тажрибасидан фойдаланган кўйи маданий ислоҳотлар ўтказишда кўрилган.
Улар жуда кўп китоблари ва мақолаларида мусулмон руҳонийлари фикрлари ва амалларини тез-тез ислом динини тушунмаслик ва Қуръонни яхши билмаслик билан изоҳлаган. Кўплаб асарларда шундай йўл тутилгани кўзга ташланади. Масалан, Абдурауф Фитратнинг “Мунозара” китоби ва ҳинд сайёҳи тилидан ёзилган ҳикояларида шу ҳолатни кўриш мумкин. Икки нафар чет эллик Қуръоннинг солиҳ нуктадонлари сифатида тасвирланади ҳамда муаллиф улар номидан Туркистон ва Бухородаги таълим, армияни бошқариш, ижтимоий-иқтисодий ҳаёт ҳолатига баҳо беради. Фикримча, Фитрат бир асарида бир европалик – французни, иккинчисида эса Ўрта осиёлик бўлмаган ҳиндни беҳуда танламаган ва улар номидан тараққиётнинг объектив сабаблари ва унга чорловчи Қуръон оятлари ҳақида бекорга фикр юритмаган. Менимча, бу одамларга, ёшларга, ислом инсон қўли тегадиган ҳар бир нарса билим талаб қиладиган дин эканини кўрсатиб бериш учун жуда яхши усулдир. Жадидлар бошқа, айниқса, мусулмонларники бўлмаган маданиятлар ва динларга нисбатан ёмон кўз билан қарамаслигини кўрсатишни яна бир карра тасдиқлаш учун тез-тез Европа ва Осиё тарихига мурожаат қилиб турган. Узоқ тарихий тараққиёт давомида маданиятларнинг мерос бўлиб авлоддан-авлодга ўтиши, уларнинг ўзаро алоқадорлиги, қадриятларининг биридан иккинчисига ўтиши ва бир-бирига кириб бориши ҳақидаги назария бағрикенглик ташвиқотининг асосий воситаси бўлиб хизмат қилган. Масалан, баъзи кишилар Шарқ, жумладан, Ўрта Осиё Европага жуда кўп нарса берган, деб ҳисоблаган. Улар IX – XII асрлардаги Ренессансни ҳамда Темур ва Темурийлар давридаги иккинчи Ренессансни ҳисобга олиб, Европа илм-фан ва тиббиёт ривожланиши (Ибн Синонинг “Тиб қонунлари” асари) соҳасида жуда кўп нарса олган деб билган. Энди эса улар, биз Европадан оладиган вақтимиз келди, чунки ушбу Ренессанс XVI асрда Маърифат асридан бошланиб, Европага кўчиб ўтган, деб ҳисоблайди. Бу ҳақда жуда кўп гапириш мумкин, гарчи одамлар турли динга итоат этиб, турли мамлакатларда истиқомат қилса-да, турли қабилалар ва миллатларга мансуб эса-да, бир отанинг фарзанди ва зурриёти эканига шубҳа йўқлигига ишончи комил бўлган. Бошқача айтганда, улар – оға-ини, модомики, шундай экан, бир-бирига меҳр кўргизиши ва бир-бирини яхши кўриши шарт. Улар асарларида Европа мусулмон Ренессанси давридаги Ўрта Осиёнинг деҳқончилиги, ҳунармандчилиги ва санъати, илм-фани ва билим соҳасидаги ютуқларини ўзлаштиргани бот-бот тилга олинади.
Улар энди қайта ўзлаштириш вақти келганини тушунади, демоқчиман. Фитрат мана бундай деб ёзган эди: “Таассуфки, агар бир йўқотилган маданиятимизни, тамаддунимизни қайтариш учун, ҳеч бўлмаса, бир ҳаракат қилмасак, уламомиз, сен кофир бўлдинг, деб айтади ва бизга халақит бера бошлайди”. Маҳмудхўжа Беҳбудий замонасидан шунчалик олдинлаб кетган киши эдики, Баҳоуддин Нақшбанд мақбарасига борганда, унинг атрофида шунчалик кўп масжид қурилганини кўриб, ўша вақт учун жасорат бўлган бир гапни айтади: “бир мусулмон учун бунчалик кўп масжидларнинг кераги йўқ, унга ибодат қилиши учун битта жойнамознинг ўзи етади. Бунчалик кўп масжид қургандан кўра, унга сарфланган маблаққа фарзандларимизни чет элга ўқишга юбориш вақти келмадимикан?” Умуман, улар ғоялари, ислом динини ислоҳ қилишга интилиши бошқа динларга нисбатан бағрикенгликни тарбиялаш ва Ғарбдан билим ўзлаштиришни ўз ичига олган.
Маълумки, жадидларнинг газеталари улар ҳаракат қилиши учун фойдали жарчи вазифасини ўтаган. Бундай газеталарни ким ўқиган? Умуман, жадидларни ижтимоий қўллаб-қувватлаш қандай бўлган?
Ўрта Осиёда ҳомийлик ҳаракати яхши ривожланган эди. Тадбиркорлар, бойлар ва савдогарлар орасида жадидларга ҳомийлик қилган кишилар кўп бўлган. Масалан, машҳур Азимбоевлар уруғини олайлик. Бу донгдор уруғ вакиллари ҳали Россия Ўрта Осиёни босиб олмай туриб, Россия билан савдо алоқалари ўрнатган, ўша ерга қатнаб турган. Албатта, уларга яхши, маълумотли, рус тилини биладиган мутахассислар керак бўлган, шунинг учун улар ушбу мактаблар ва газеталариннг аҳамиятини яхши тушунган. Масалан, Саид Азимбоев бундай мактаблар очиш учун махсус жой ажратган, пул берган. Андижон вилоятидан Миркомилбой ҳам пул ажратган. Бундай кишилар жуда кўп эди. Улар газеталарга ҳомийлик қилган, чунки ҳомийлик маблағларисиз газеталарни чоп этишнинг иложи бўлмаган. 1900 йилдан бошлаб, Ўрта Осиё учун нисбатан кўп газеталар пайдо бўлган. Масалан, 1906 йилда Обидов муҳаррирлигида “Тараққий” газетаси нашр этилган, ўша йили Мунавварқори раҳбарлигида “Хуршид”, 1907 – 08 йилларда Абдулла Авлоний муҳаррирлигида “Шуҳрат” газетаси чиқа бошлаган. Бектемиров “Осиё” газетасига раҳбарлик қилган. Бироқ тез орада мустамлакачилар ҳукумати ўз эксперти Остроумов берган маълумотга таяниб, ушбу нашрларни ёпади. Остроумов мактаблар ва газеталарни ёпиш учун кўп “жонкуярлик” қилган. Бироқ маърифатпарварликнинг газета ва журналлар чоп қилиш билан ифодаланган янги тўлқини 1913 йили бошланди ҳамда “Самарқанд”, “Садои Туркистон”, “Садои Фарғона”, “Эл байроғи”, “Кенгаш”, “Турон” ва Ойна” сингари газета ва журналлар дунё юзини кўрди. 1917 йилга келиб, Туркистон мухторияти ўрнатилгач, “Ҳуррият”, “Нажот”, “Буюк Туркистон” ва энг муҳими, Саид Азимбоевнинг шарофати билан “Тужжор” газетаси пайдо бўлди. Ўша газета жадидлар учун минбар вазифасини ўтади, ислоҳот борасидаги ғояларини тарғиб қилиш билан янада кўпроқ имкониятлар очиб берди. Умуман олганда, улар сони 15 та бўлиб, улкан мафкуравий кучга эга эди. Мен 1917 йилдан сўнг матбаа ишлари қанчалик ривожланганини билмайман, чунки энди бошқа қонунлар амал қила бошлаган эди. 1918 – 1919 йилларга келиб, Совет ҳокимияти билан ҳамкорлик қилишга рози бўлган жадидлар фаолият кўрсатган қайсидир газеталар бошқа номлар билан чиқиб турган. Лекин орадан кўп ўтмай ҳаммаси ёпилиб кетди.
1916 йилда Россия империясида “янги усул”га асосланган 5000 дан ошиқ мактаб бор эди. Ушбу мактабларнинг ташкил этилиши ва ривожланиши ва уларда рус тилига қандай муносабат бўлгани ҳақида гапириб берсангиз.
1917 йилда Туркистонда 100 та жадидлар мактаби бўлган ва албатта, улардаги ўқитиш муллалар ва мусулмон руҳонийлари қаршилигига учраб турган. Аввалбошданоқ бу мактаблар Европа мактабларига яқин ва таълимни ривожлантиришга ёрдам беради, деб қаралган, лекин тез орада бундай янги мактаблар омма онгига янгиликлар олиб кираётгани ва ёшларнинг саволлари кўпайиб кетаётгани, жумладан, миллий онг уйғонаётгани фаҳмланган. Ва навбати билан ёпила бошлаган. Бундай мактаблар жуда кўп нарса бераётган эди. Албатта, аҳоли аста-секин ота/она савод чиқариш учун фарзандини 40 кун ўқитиши кераклигини тушуна бошлади, оддий мактабда эса бола 10 йил ўтиради, мадрасада эса 10 – 15 йил ўқийди ва фақат Қуръонни ёд олади. Яна мактабда хивич билан савалаш тизими мавжуд эди. Албатта, улар айни мактабларни устувор аҳамият бериши зарур бўлган муассаса деб тушунган, лекин айтиб қўйишим жоизки, жадидлар ҳаракатини кенг миқёсли бўлган дейиш хатодан бошқа нарса эмас, чунки аҳолининг аксарият қисми мусулмон руҳонийлари таъсирида бўлган, жадидлар мактабларида тафаккури ривожланган ва бу мактабларнинг истиқболини тушунган кишилар фарзандлари таълим олган. Жадидлар мактабларини Европа мактабларига бевосита ўхшаш бўлган, дейиш қийин, лекин уларда ўша мактабларнинг дастлабки намуналари (прообраз) бор эди. Биринчидан, улар парталар билан жиҳозланган, бу мактаблардаги болалар мусулмон мактабларидаги сингари ерда ўтирмаган ва ўқитувчилар уларнинг боши устида калтак ўйнатиб турмаган. Жадидлар мактабларида китоблар, кейинчалик эса хариталар бўлган.
Бу ўринда дарсликлар нашр қилишда Маҳмудхўжа Беҳбудий ва Мунавварқорининг хизматларини алоҳида эътироф этиш жоиз. Дастлаб дарсликлар бўлмаган. Улар Россиядан олиб келинган ва татар мактабларига мўлжалланган бўлган. Исмоил Гаспринский бу масалада катта ёрдам кўрсатган. Жадидлар сўнгра ўзи дарсликлар чоп қилишга ўтган. Мунавварқори ва Беҳбудий жуда кўп дарсликлар ёзган. Масалан, “Китоби аввал” ёки математика, адабиёт, география бўйича дарсликларни олайлик. Албатта, улар қайсидир даражада Россия дарсликларидан ўзлаштирилган бўлиши мумкин, лекин шунга қарамай, бу жуда катта олға силжиш эди. Жадид мактаблари синфларида глобуслар турган. Бу эски миқёслар билан солиштирганда, бутунлай янги нарса эди ва албатта, ажойиб натижалар берган. Чор ҳукумати ушбу мактабларни дастлаб, ҳали улар ёпилмай туриб, назорат қилишга ўтган, ҳатто ўқувчиларга “Боже, царя храни” (“Худоё, подшони ўзинг асрагин”) мадҳиясини ёдлатишга кўрсатма берган.
Рус тили борасида шуни айтмоқчиманки, жадидларнинг кўпчилиги бу тилни яхши билган. Тил концепцияси Беҳбудийнинг “Бир тил эмас, тўрт тил керак” деб номланган мақоласида очиб берилган, яъни унга кўра, Россия империясида яшаётганимиз сабабли, айниқса, рус тилини билишимиз зарур. Биз ҳаракатимиз тактикасини ишлаб чиқиш учун қандай бошқарилаётганимизни тушуниб олишимиз шарт. Жадид мактабларида рус тили ҳам ўқитилган. Улар Европа адабиётига жуда қизиққан.
Ҳатто бунга Фитратнинг “Оила ва оилани бошқариш тартиби” рисоласини ҳам мисол келтиришим мумкин. Албатта, рисола мусулмонлар ҳаёти ва мусулмон оиласи меъёрларини билишга асосланган. Юқорида айтиб ўтганимдек, муаллиф рисоласида замонавий кишининг оиласи, эр-хотиннинг фарзандлари билан муносабатлари қандай бўлишига оид Қуръон оятлари ва ҳадисларга таянган. Булар барчаси тараққийпарварлик нуқтаи назаридан кўрсатиб берилган. Лекин бошқа тарафдан, чет элларда чоп қилинган кўплаб нашрлардан, хусусан, Шарл Сейнобоснинг (Charles Seignobos – француз тарихчиси) ишлари ва ҳк.дан фойдаланган.
Айни ўринда мен яна бир нарсани алоҳида таъкидлаб ўтмоқчиман: жадидлар тадбиркорлар, савдогарлар, бошқа турли бой кишилар кўмагида Туркистон ёшларини чет элларга ўқишга жўнатган. Билишимча, 22 киши Германияга, хусусан, Ҳайделберг университетига юборилган. Яна қанчадир киши Россияга бориб ўқиган. Дарвоқе, 1917 йилдан сўнг Совет ҳокимияти билан ҳамкорлик қилган жадидлар Октябрдаги давлат тўнтаришидан сўнг маърифатпарварлик ва таълим муассасаларида ишлаган. Ёшларни чет элларга ўқишга жўнатиш давом этаверган. Бу ишда уларнинг хизматлари катта эди. Ўқишга юборилган ёшларнинг ҳаммаси ҳам уни битира олмаган. Улар орасида Саратов университетини ҳуқуқшунослик ихтисоси бўйича битирган Убайдулла Хўжаев ҳам бор эди. Иқтисодиёт университетларини битирган бошқа жадидлар ҳам бўлган. Аммо қозоқ жадидлари орасида Россиянинг Москва ва Санкт-Петербург университетларида ўқиганлари Туркистон жадидларидан анча кўп бўлган.
Ўша вақтда сиёсий вазият жуда оғир эди ва кўплаб жадидларнинг сиёсий қарашлари турлича бўлгани ажабланарли эмас. Агар ўтмишга назар солинса, болшевикларни қўллаган жадидлар ким бўлган, улар омон қолиб, Совет ҳокимиятининг бир бўлагига айланганми ёки барчасини бир тақдир кутиб турганмиди?
Биринчидан, илк тўлқинга мансуб жадидларни иккинчи тўлқинга мансуб ёшроқ жадидлар ҳаракати билан солиштириш мумкин эмас. Масалан, 1920 йилдаёқ Бухоро билан Хивадаги жадидларнинг аниқ сиёсий талаблари бўлган. Жадидларнинг маърифатпарварлик ҳаракати иккита: маърифатпарварлик ва сиёсий босқичларга бўлинади. Пировардида Туркистон жадидлари фақат маърифатпарварлик билан ислоҳотларни амалга ошириб бўлмаслигини тушуниб етади. Агар давлатнинг ўзи мана шу ислоҳотлардан манфаатдор бўлмаса, улар буни амалга ошира олмайди ва шунда жадидлар тизимни алмаштириш керак эканини билиб олади. Бу 1916 йили Тошкент шаҳар думасига сайлов пайтида яққол кўзга ташланди, ўша пайтда Маҳмудхўжа Беҳбудий ва Закий Валидий Тўғон сайловда номзод сифатида қатнашган эди. Зикр этилган дума раҳбари Малицкий консерватив аҳоли ҳеч нарсани тушунмайди, шунинг учун уларга овознинг жуда кам қисмини ажратиш керак, деб ҳисоблаган. Жуда кучли мунозаралар бўлиб ўтган – бу қурултой депутатларининг баённомаларида акс этган. Лекин улар бу вақтга келиб, кескин ўзгариб кетган, бу ҳокимият ўзига ҳеч нарса бермаслигини, Совет ҳокимияти мустамлакачи ҳокимият тутимини давом эттираётганини тушуниб етган эди. Жадидлар Қўқонда Туркистон Республикасини ташкил қилмоқчи бўлганда, кейинчалик у қонга ботирилди. Бухоро билан Хивага келсак, Бухоро ва Хива жадидлари болшевикларга ишонган. Улар ҳокимиятни эгаллаш ҳамда амир билан хонни ағдариб ташлашга интилиб, болшевиклар билан битим тузади, – балки жадидлар романтик бўлгандир – улар болшевиклар ўзига амирни ағдариб ташлашида ёрдам беришига қаттиқ ишонади. Масалан, Бухорода Файзулла Хўжаев амирни тахтдан ағдариб, ўз мустақил давлатини бошқаришни ва барпо этишни ўйлаган. Ҳа, болшевиклар ёрдам берди. Фрунзе армияси билан Бухорога бостириб кирганини биламиз. Бундан Бухоро меъморчилиги ва аҳолиси катта зарар кўрди. Лекин бундай бўлиб чиқмади. Ҳа, Бухоро Халқ Совет Республикаси ва Хива Халқ Совет Республикаси ташкил топди. Жадидлар орзу қилганидек, бу республикалар уларники эди, улар ўша республикаларда ўз ғояларини амалга ошириши мумкин эди. Лекин бундай бўлиб чиқмади. Болшевиклар аста-секин бу ҳукуматни тирқиратиб юборди. Масалан, Хивада ҳукумат 4 – 5 марта алмашди, РКПБ (Россия коммунистик (болшевиклар) партияси) ишларига тинмай аралашаверди. Пировардида Хива коммунистик партияси ва Бухоро коммунистик партияси РКПБнинг бир бўлагига айланди, 1925 йилда улар Ўзбекистон республикаси таркибига қўшилиб кетди.
Жадидлар ўртасидаги келишмовчиликлар олдин ҳам бўлган. Келишмовчиликлар жадидлар ҳаракати концепциясини ишлаб чиқиш чоғида юзага келган. Ҳокимиятни давлат тўнтариши ясаш йўли билан эгаллаш керак деб ҳисоблайдиган жадидлар ҳам бор эди. Беҳбудий билан Мунавварқори қон тўкилишига қарши чиқди. Улар Россия шунчалик кучлики, биз у билан тенг бўла олмаймиз, ҳақларни тинч йўл билан қўлга киритиш зарур, деб билди.
Барча жадидларни бир ҳил тақдир кутаётган эдими ёки ундай эмасми?
Ҳа, шундай. Бу иккинчи босқич бўлган ва фақат 1937 йилда бошлангани йўқ. Бу анча аввал, 1928 – 1929 йилларда бошланган, чунки ўша пайтда Мунавварқори илк марта ҳибсга олинган, кейин озод этилиб, яна қўлга олинган, ўша қамоқхонада “Хотиралар”ини ёзган. 1931 йили Москвада отиб ташланган. Москвада суд қилинган. У Совет ҳокимиятига қарши чиққан яширин “Миллий иттиҳод” қўпорувчилик ташкилотини тузганликда айбланган. Аслида унинг ташкилоти “Турк ўчоғи” деб аталган ва ташкилотда мустақилликка оид айрим фикрлар билдирилган бўлса ажаб эмас. Бўлиши мумкин. Лекин улар ижтимоий маърифатпарварлик билан шуғулланган. Жадидларнинг аксарияти: Абдулла Қодирий ҳам, Чўлпон ҳам, Боту ҳам – Анҳор бўйида отиб ташланган. Бизда Анҳор устида бир кўприк бўлган – “Алвасти кўприк” деб аталган. Ҳозир ўша жойда Қатағон қурбонлари музейи барпо этилди, жадидлар ҳақидаги барча маълумотлар шу музейда сақланади. Ҳатто 76 яшар чол Жунайдулла Ибрат ҳам Наманганда ҳибсга олинган ва у ҳам отиб ташланган. Беҳбудийнинг ўлимига оид бир неча талқин мавжуд. У Совет ҳокимияти ўрнатилган вақтдан бошлаб, сиёсатдан воз кечиб, маориф идораларида ишлаган. Бироқ 1919 йилда у касал эканини важ қилиб, ҳаж қилишга қарор қилади, ҳарқалай, расман шундай деган. Лекин бемор одам қандай қилиб ҳажга бориши мумкин? Бир талқинга кўра, у Туркистон мустақиллиги масаласини муҳокама қилиш учун аллақандай чет эл ташкилотлари вакиллари билан учрашмоқчи бўлган, лекин бу исботини топгани йўқ. Яна бир талқинга асосан, ўша ёққа кетаётганда, Қарши шаҳрида амир югурдаклари уни қўлга олган ва қатл этган.
Жадидлар нима ишларни қилишга муваффақ бўлган ёки муваффақ бўлмаган, қандай хатоларга йўл қўйган ва қандай мерос қолдирган?
Улар қандай мерос қолдиргани мен юқорида гапириб берган нарсалардан маълум бўлди. Жадидлар нималарга муваффақ бўлди? Одамлар онгида ўзига хос ўзгариш ясашнинг уддасидан чиқа билди. Жамиятни ўзгартириш концепциясини ярата олди ва концепция барча масалаларни қамраб олди. Янги авангард жадидлар адабиёти, янги драматургияга асос солди. Туркистонда биринчи театрни ишга туширди. Таълимнинг янги шаклларини яратди. Улар – эҳтимол кичик кўринишда бўлгандир, аммо – бутунлай янги маданият яратди. Одамлар онгида аёлларга нисбатан кичик бўлса-да, ўзгариш ясай билди, чунки асарларида аёлларнинг жамиятни ривожлантиришдаги аҳамияти ҳақида фикр юритилади. Албатта, бирдан паранжини ташлаб, юзни очиб, жамият ишларида иштирок этишга даъват этмайди. Лекин фикримча, улар шунга етиб бориши аниқ эди, чунки Абдурауф Фитратнинг мен эслаб ўтган оила ҳақидаги китоби асосий қисми аёлга, уни қандай ҳурмат қилиш ва унга қандай муносабатда бўлишга бағишланган. Ўша китобда “Қиз болалар ўқиши керакми?” деган банд ҳам бор. Муаллифга кўра, инсоннинг интеллектуал ҳолати, оладиган таълими кўп жиҳатдан аёлларга, оналарга боғлиқ. Ёзишича, эркак тирикчилик учун егулик-ичгулик топиш билан банд, аёл эса эркакдан кўра маълумотлироқ бўлиши шарт, чунки у, асосан, болалар билан шуғулланади. Дарҳақиқат шундай. Аёллар таълим ривожланганини ва аёллар мактаби бўлганини, уларда аёллар таълим олиб, Шарқ мумтоз адабиёти ўқитилганини биламиз. Албатта, мен техникага оид фанлар ҳақида гапираётганим йўқ, лекин шундай бўлса ҳам, аёллар таълим олган. Лекин бу – бизнинг маданий меросимиз, умумий меросимизнинг бир бўлаги. Умуман, бу – нафақат Ўзбекистоннинг, қолаверса, барча халқларнинг, барча туркий халқларнинг, туркий бўлмаган халқларнинг, Марказий Осиё халқларининг мероси, чунки бу интеллектуал муҳит мавжудлигини, эрлар, уларнинг онги ва интилишлари қандай бўлганини кўрсатади. Масалан, Беҳбудий мавзусига яна бир карра қайтаман. У ҳажга борганида Байрут университетини зиёрат қилади. Ҳайратга тушиб, “Эй Худо, буларнинг лабораторияларини қаранглар”, деб ёзади. У кимё лабораторияси билан танишади. “Бу ерда қандай талабалар ва қизлар ўқиётганини қаранг! Ютуқлар ҳам шунча бўладими! Нега бу мусулмон мамлакатида бундай университет бор, биз ҳам мусулмон мамлакатимиз, лекин Туркистонда олий даражадаги бирорта ҳам, ҳа-ҳа, бирорта ҳам таълим муассасаси йўқ?”. Албатта, мадрасалар кўп бўлганини биламиз. Лекин бир пайтлар, масалан, Х асрда билим жарчиси бўлган мадрасалар XIX асрга келиб, бутунлай ўзгариб кетди. Билим олишнинг ҳеч бир талабига жавоб бера олмайдиган бўлиб қолди. Жадидлар нималарни эплай олмади? Таассуфки, улар Туркистон мухториятини ташкил қилганида [муваффақиятсизликка учради] – Қозоғистонда қандай бўлганини билмайман, лекин Қозоғистондаги вазият бошқачароқ бўлган, чунки улар Россияга, Европага яқинроқ эди. Яна қайтариб айтаман, олий таълим олган, Россия ва ҳатто чет элларда ўқиган одамлар, жадидлар кўп бўлган. Бу ерда-чи? Туркистон жадидлари орасида мутахассислар кам, жуда оз бўлган. Улар иқтисодиётни умуман тушунмаган. Замонавий юриспруденция, жумладан, жаҳон юриспруденцияси ҳақидаги тушунчаси жуда заиф бўлган. Давлатни бошқаришга киришиш учун мана шу соҳалардаги билим етишмаган. Ваҳоланки, улар республика, давлат қураётган эди. Улар орасида бундай мутахассислар бўлмаган – уларнинг камчилиги шу эди. Катта хатоси болшевикларга ишонгани бўлган. Мен Бухоро ва Хива жадидларининг уларга бундай кўр-кўрона ишонганини, дўст деб билганини, ёрдам беради, деб кутганини, давлат тўнтаришидан сўнг мухториятни ўзимиз бошқарамиз, деб ўйлаганини назарда тутяпман. Менимча, уларнинг камчиликлари – мана шулар.
[1] Аслида, бу – ҳадис (таржимон).
