Сурат манбаси: eenergy.media
Forbes нашри доимий муаллиф Мелик Кайланннинг “To Balance The Global Pressure From Russia And China The West Must Help Uzbekistan” номли мақоласини чоп қилди.
Қуйида ушбу мақоланинг ўзбек тилига таржимаси қисқартирилган ҳолда эътиборингизга ҳавола қилинмоқда.
Қарийб 200 йилдан бери илк марта ҳамманинг назари Марказий Осиё минтақасига тикилган ва Ўзбекистон минтақанинг ўзаги ҳисобланади. Яъниким, Ипак йўли бўйида жойлашган мамлакатлар ташқи кучларнинг чалғитишига учмай, ўз тақдирини ўзи белгилашдай чин маънодаги имкониятга эга. Бироқ барча минтақавий ва глобал кучлар бирлашмаса, бу имконият кучли бўлиш ўрнига заифлашиб қолиши мумкин.
Ўзбекистон биринчи навбатда қўшни Афғонистонга улкан таъсир кўрсатиши керак ва кўрсатмоқда ҳам. Афғонистондаги беқарорлик тез орада келажагимизга таҳдидга айланиб кетиши мумкинлигини тушуниб олдик. Террористик таҳдидларни тийиб туришга сарфланган сўнгги 20 йилни бой берилган ўн йилликлар деб аташимиз мумкин, чунки ўша вақт мобайнида глобал рақиблар таъсир доирасини ёйиб, Россия Европада ва Хитой Тинч океани минтақасида таъсир доирасини кенгайтира бошлади. Бундан ташқари, Марказий Осиёда устун мавқега эга бўлган ҳар қандай йирик давлат нефт ва газдан тортиб, олтин ва урангача бўлган арзон хом ашёдан фойдаланиш, ҳатто уларни бошқаларга йўл бермайдиган тарзда ишлатиш имконига эга бўлади. Минтақа советлар ҳукмронлиги даврида бўлгани каби яна иккала тарафдан ҳам – Эрон билан Покистон ўртасида берк маконга айланиб қолиши ҳеч гап эмас.
Ҳозирги пайтда Хитой иккала томондан ҳам ўраб олинган мамлакатларнинг устун савдо шериги бўлиб турибди. Расмий Пекиннинг яқинда Эрон билан эришилган 400 миллиард АҚШ долларилик келишуви шов-шувларга сабаб бўлди ҳамда у Хитойга Эроннинг барқарор арзон нефтидан фойдаланиш, Эронга эса Ғарб санкциялари босими остидан чиқиш йўлини топиш имкониятини берди.
Бундан кейинги глобал энергетика мувозанатига тузатишлар киритилиши Эрон қўшни мамлакатларга нисбатан ҳужумкор мавқеда – ядро қуроли билан бирга – бўлишига, Хитой пул бирлиги эса бутун бошли минтақада доллар ўрнини эгаллашига олиб келиши ҳеч гап эмас. Россияга келадиган бўлсак, унинг минтақадаги таъсирини тушунтириб ўтиришнинг ҳожати йўқ.
Ҳақиқий мустақиллик ўз миллий тақдири устидан тўлиқ назоратни қўлга киритишни англатади ва минтақа таркибига кирувчи мамлакатлар ҳали тўғри йўналишни топиб олиши керак бўлади. Қозоғистон маълум муддат яхши ривожланди, аммо у ҳозир сулола модели домидан чиқиб кета олмаётганга ўхшайди – ҳозирги кунда мамлакат дуч келаётган муаммоларининг сабаби шу. Қирғизистон бир инқироз билан иккинчиси ўртасида сарсон бўлиб юрибди. Ҳам ҳудуд ўлчами, ҳам аҳоли сонига кўра энг кичик республикалардан бири бўлган Тожикистоннинг омонат барқарорлиги Россия билан Хитойнинг ҳомийлигига қарам бўлиб қолган. Туркманистон ҳақида… қанчалик кам сўзланса, шунчалик соз.
Ушбу манзарада Ўзбекистон келажак учун ягона умид шуъласи бўлиб турибди. Собиқ раҳбар Ислом Каримовнинг постсовет давридаги қарийб 25 йиллик қаттиққўл бошқарувидан сўнг мамлакат ташқи дунёга очилди ва жадал ривожлана бошлади. Янги президент Шавкат Мирзиёев ҳокимиятга келгандан сўнгги тўрт йил давомида рўй берган ўзгаришлар ақлни шоширади. Мен чиндан ҳам собиқ тузум билан янгиси ўртасидаги тафовут ҳақида иккита мақола ёзган эдим, жорий йил мартида Ўзбекистонга қилган энг сўнгги сафарим чоғида эса бунинг амалдаги исботини ҳар жойда кўриш мумкин бўлди. Ўзбекистон Сингапур, Малайзия ёки Ҳиндистон сингари қитъанинг иқтисодий жиҳатдан муваффақиятли моделларидан андоза олаётган, бироқ қўшимча кучли экологик ва тарихий мезонларга эга Ўрта Осиё мамлакати эканини тушуниш лозим. Ўзбекистон йирик шаҳарларидаги катта кўчалар ва улар бўйларидаги бинолар чиннидай тоза ва таъмирланган. Жумладан, тарихий қадамжолар ҳам – Венециядан фарқли ўлароқ, мамлакатда улар сони жуда кўп. Самарқанд ва Бухоро янглиғ афсонавий шаҳарлар чеккаларида оммавий тарзда замонавий қурилиш ишлари бошланди, шу билан бирга, тарихий марказлар ёки атроф муҳитга зарар етказмаслик учун ишлар пухта режалаштирилмоқда. (Дейлик, бу ҳолатни Туркия бутунлай тескари манзарани кўрамиз: у ерда ялтироқ янги бинолар ўрмон, денгиз бўйи ва кўҳна маконлар ўрнида қад кўтармоқда).
Эътиборлиси шуки, минтақадаги ёки исталган минтақадаги мамлакат аҳолисидан фарқли ўлақроқ, Ўзбекистон аҳолиси ўз аҳволини жуда некбин баҳолайди. Туркиядан бошлаб, Эрон орқали Покистон ва бошқа мамлакатларга қадар имконият берсангиз, маҳаллий аҳоли тинмай жағ уриб, ҳукуматдан шикоят қилади. Бунинг зидди ўлароқ, шахсан ўзим фикрини сўраган барча ўзбеклар (мамлакатда ҳам, чет элларда ҳам) одатда ўз мамлакати ҳақида норози бўлиб гапиришни истамайди. Эҳтимол бу қисман узоқ муддатли қамал ҳолатининг тугаши ва келажакка умид билан қарашдай тарихий лаҳза бўлиши ҳам мумкин. Қозоғистондаги Назарбоев ҳукмронлигининг дастлабки ўн йилида ҳам айни ҳолат кузатилганига шубҳа йўқ. Бироқ ўзбекларга хос некбинликнинг пойдевори бутун ва ҳукумат кўраётган аниқ чора-тадбирларга асосланади. У, масалан, ватандошлар ўзини доимо демократиянинг органик – узвий шаклига мойиллигини кўрсатаётган давлат шакли ва йўналишига дахлдорлигини ҳис қилишида жуда асқатади. Ўзбекистоннинг ҳам шаҳар, ҳам қишлоқ жойларда “маслаҳат марказлари” тармоғини ташкил этиш билан интерфаол бюрократиянинг янги шаклини яратгани ноёб ҳодисадир, аҳоли ўша марказларга кириши ва адолатсизлик ҳолатларидан шикояти қилиши ёки қайсидир Ғарбдаги мавзеларнинг режалаштириш қўмиталари йиғинига ўхшайдиган мажлисларда иштирок этиши мумкин. Қонунбузарлик ҳолатлари тузатилмаган жойларда аҳоли улар ҳақидаги маълумотларни ижтимоий тармоқлар орқали тарқатади – давлат ватандошларга ўз фикрини шу тариқа билдиришга изн берган.
Ўзбекистондаги давлат институтлари пухта ўйланган тарзда, ва шу билан бирга, жамоатчилик фикрининг кўпчиликка хос бўлган консерватив бўлакларидан унча олдинлаб кетмаган ҳолда эркинликларга рухсат бериши ва ўзлари ҳам уларни сингдириб олиши муҳим аҳамиятга эга. Ҳаддан зиёд ғарблашув – Россия, Хитой, Эрон ёки “Толибон” бўладими, бундан қатъи назар – бирпасда кучли қўшниларнинг ғазабини келтириши ҳам мумкин. Тбилисининг Саакашвили президент бўлган йиллардаги фожиали намунаси ҳар қандай миллий даражадаги тез ривожланиш хавф туғдириши мумкинлигидан далолат беради. Мабодо қўшни мамлакатлар Грузияда бўлгани каби ўз ички ишларига аралашиб, бўлгинчилик ёки норозилик кайфиятини қўзғайдиган даражада хафа қилинса, инсон ҳақлари, сўз эркинлиги ва эркин иқтисодиёт соҳасида қилинадиган тўғри ишлар ҳеч нарсага арзимай қолади. Президент Шавкат Мирзиёев президентлигининг дастлабки бир неча йилини қўшни мамлакатларга сафар қилиб ва улар билан яхши муносабатлар ўрнатишга сарфлаб, оқилона иш тутди. У олдига Ипак йўли бўйида жойлашган мамлакатларни яқинлаштириб, ўзига хос савдо блоки тузишни мақсад қилиб қўйди. Мирзиёев ҳисоб-китобига кўра, битта мамлакатдан кўра, бутун бошли блокни беқарорлаштириш мушкул. Айни чоқда у глобал фондлар мамлакатнинг пойдевори мустаҳкамлигидан манфаатдор бўлиши ва хавфсизлигини сақлашга ёрдам бериши учун бутун дунё, жумладан, Европа ва Осиёдан Ўзбекистонга инвестиция киритилишини рағбатлантирди.
Биз Ўзбекистон тимсолида жуғрофия тақдир экани тўғрисидаги қоидани бузишга, улкан гегемон кучлар соясида эркинлик ва мустақилликка интилаётган мамлакатнинг яна бир намунасини кўряпмиз. Ғарб, айниқса, совуқ уруш давридан бери бундай иттифоқчиларни қўллай олмай келгани учун ҳам бу борада муваффақиятни таъминлаши шарт. Ҳар бир омадсизлик, яъни қўлламаслик янада кўпроқ таҳқирлашга сабаб бўлади. Йирик давлатлар нарсаларга елка оша қарашни давом эттираверса, бурнининг тагида рўй бераётган нарсаларга аралашишдан чўчиб қолади. Агар биз Украина ва Тайвандаги муаммоларга енгил ечим ахтарадиган бўлсак, Ўзбекистонни ҳам эътибордан четда қолдира олмаймиз.
Манба: Forbes.com
