Сурат манбаси: medpagetoday.com
Муаллиф: Зайнаб Муҳаммад Дўст
Ҳар йилнинг октябрь ойи Диққат етишмаслиги ва гиперактивлик синдроми (ДЕГС) ташҳисидан хабардорлик ва ушбу муаммога кенг жамоатчилик эътиборини қаратишга бағишланади. Бу ўзига хос анъанага айланган деса ҳам бўлади.
UzAnalytics сайтида чоп этилаётган ушбу мақолада болалардаги ДЕГС, аутизм ва дислексия сингари ҳолатлар билан боғлиқ муаммолар ва ривожланиш хусусида фикр юритилади. Унда ташхис қўйилган болаларнинг тавсифи ва ривожланган мамлакатларда қўлланилаётган ёндашувлар муҳокама қилинади. Бундан ташқари, айрим уйдирмалар ҳам тилга олиб ўтилади.
Ўзбекистонда кенг жамоатчилик кўпинча болалардаги ДЕГС, аутизм ва дислексия сингари ҳолатлар ҳақида эшитмаган ҳам. Соғлиқни сақлаш вазирлиги мамлакатда қанча аутизм ташхиси қўйилган, ДЕГС ёки дислексияга чалинган болаларнинг сони ҳақида ҳеч қандай маълумот бермайди.
− Статистик маълумотлар йўқ, − дейди Тошкентдаги аутист болалар ва катта ёшлилар ҳақида стигмаларга[1] қарши курашувчи тошкентлик мутахассис ва фаол Фарҳод Ортиқбоев. – Республика болалар ижтимоий мослашув маркази рўйхатига 400 аутист бола киритилган, лекин шахсан ўзим аутист фарзанди бор 1000 га яқин оилани биламан. Аслида улар бундан ҳам кўп, аммо ота-оналар бу каби фарзандларини бекитиб юради. Энг муҳими, “аутизм” синдромига ташхис қўйиб берадиган мутахассислар деярли йўқ. Улар бармоқ билан санарли, − дейди у.
Айни дамда мамлакатда руҳий синдромларни кенг қамровли тушуниш етишмайди, илк марта аутизм ташхиси 2010 йилда қўйилган, бунга Фарҳоднинг ўғли Муҳаммадали учун қатъий туриб олгани сабаб бўлган эди.
Булар нимани англатади?
Ҳамма нарсага ойдинлик киритиб олиш учун ишни атамаларнинг асосий тавсифини келтириш билан бошлаш керак бўлади. Бу улар руҳий саломатлигининг жиддий бузилишини англатади, дегани эмас; шунинг учун мутахассислар айрим ҳолларда уларни касаллик эмас, ҳолат деб аташи мумкин. Бунинг маъноси шуки, муаммонинг жиддийлиги бир шахсда бошқасидан фарқ қилади.
ДЕГС – Болаларда диққат етишмаслиги ва гиперактивлик синдроми (инглизча Attention Deficit Hyperactivity Disorder – ADHD) белгилари хулқ-атвор билан боғлиқ муаммоларнинг икки тури сифатида тоифаланиши мумкин: 1) диққатни жамлай олмаслик ҳамда тиниб-тинчимаслик ва 2) ўйламасдан харакат қилиш (импульсивлик). ДЕГС яна Диққатни жамлай олмаслик (Attention Deficit Disorder) деб ҳам аталади. Бунинг асосий белгилари бола эътиборининг осон чалғиши ва диққат қилиш вақтининг (attention span) қисқалигида кўринади. У эътиборсиз хатолар қилиши, нарсаларни унутиб қолдириши, йўқотиши ҳамда гапга қулоқ солмаслиги ва кўрсатмаларни бажармаслиги мумкин. Болалар йиғинчоқлик борасида қийинчиликларга дуч келади. Гиперактивлик ва импульсивлик тинч ўтира олмаслик, кўп гапириш, навбат кутиб туришга тоқат йўқлиги, ўйламай ҳаракат қилиш, ҳамма нарсага қўшилиб кетавериш ва қўрқув ҳиссининг йўқлигида кўзга ташланади.
Аутизм – Бу ёш боланинг исмини айтиб чақирилганда жавоб бермаслик, кўзга тик қарашдан қочиш ва кулиб қараганга жавоб қайтармаслик ҳолатларида намоён бўлади. Болалар такрорий ҳаракатлар қилади; бирор товушни эшитганда, бирор ҳидни сезганда ёки таъмни татиб кўрганда, хафа бўлиши мумкин. Улар бошқа болаларга ўхшаб кўп гапира олмаслиги ёки гапларни такрор-такрор айтиши мумкин. Катта ёшдаги болалар аутизми бошқалар нимани ўйлаётгани ёки ҳис этаётганини тушуниш имконини бермайди. Нимани ҳис қилаётганини ифода қилишда қийналади. Бундай болалар кун тартибини яхши кўради, унинг ўзгаришини асло истамайди. Баъзан дўст орттириш учун жон-жаҳди билан ҳаракат қилади. Кўпинча нарсаларни сўзма-сўз тушунади, масалан, улар инглиз тилидаги “break a leg” («оёғингни синдир», аммо аслида «ишларингга омад» дегани) ёки испанчадаги “levantarse con las gallinas” («товуқлар билан туриш», яъни “анча эрта туриш”) деган ибораларни тушунмаслиги мумкин. Ўзбек тилида бунга “қовун тушириш”, “юрагим чиқиб кетди” сингари иборалар мисол бўлади.
Дислексия сўз ёки сонларни тушуниб олиш билан боғлиқ муаммоларни англатади. Болалар, ақлли ва ўрганиш иштиёқи баланд бўлишига қарамай, ўқишни ўрганишда муаммоларга дуч келиши мумкин. Дислексия аломатлари одатда бола мактабга борганида ҳамда ўқиш ва ёзишни ўрганиш учун диққатини жамлаётганида юзага чиқади. У жуда секин ўқиши ва ёзиши, сўзлардаги ҳарфлар тартибини чалкаштириб юбориши, ҳарфларни нотўғри ёзиши, оғзаки ахборотни тушуниши, аммо ёзилган ахборотни тушунишда қийналиши мумкин. Улар кўрсатмаларни кетма-кет бажаришда ҳамда режалаштириш ва бирор нарсани ташкил қилишда мушкул аҳволга тушиб қолади.
Ташхис қўйиш ва ёндашув
Бунақа ҳолатларга ташхис тиббий текширув орқали эмас, белгилар ва кузатувлар орқали қўйилади.
ДЕГСга келсак, унинг 3 тури мавжуд: диққат етишмаслиги, гиперактивлик/импульсивлик ва аралаш тур. АҚШ ва Буюк Британияда ташхис камида 6 ойда кўзга ташланган аломатларга асосланган ҳолда қўйилади. Аломатларнинг юқорида қайд этилган рўйхати сурункали бўлиши, инсон фаолиятини бузиши ҳамда бола ёшига нисбатан ривожланишда ортда қолаётганига сабаб бўлиши лозим. Бундай ҳолатлар ташхис қўйиш учун етарли асосга эга бўлиши учун уйда ҳам, мактабда ҳам рўй бериши лозим. Бунинг учун боланинг қандай ўзлаштираётганини баҳолайдиган Коннерс сингари тестлардан фойдаланилади. 6 – 18 яшар болалар ҳам сўровнома саволларига ўзи жавоб бериши мумкин, бу уларнинг ҳолатини баҳолашда кўмаклашади[2]. Ушбу ёндашувда тиббий ва тиббий бўлмаган (когнитив хулқ-атвор терапияси) усуллар қўлланади. Бу аломатларни енгиллатиш ва ҳолат билан боғлиқ муаммони камайтиришда ёрдам беради. Британия ва Америкадаги дўхтирлар иккала усулнинг бирикмасини тавсия қилади. Айрим дорилар таркибида метилфенидат, дексамфетамин, лиздексамфетамин, атомоксетин ва гуанфацин бор. Улар диққатни жамлаш, импульсивликни камайтириш, хотиржамлик ва ўқиб-ўрганишда ёрдам беради.
Умуман олганда, Европа ДЕГСга ташхис қўйиш ва ёндашувда АҚШ қадар олдин кетган эмас. Яқин-яқинларгача ДЕГСга Американинг фантазияси деб, эътибор берилмай келаётган эди. Вақт ўтиши билан бутун Европа миқёсида эътибор пайдо бўла бошлади. 2007 йили Европа парламенти Европа муаасасалари ва сиёсатчиларини ушбу масалага кўпроқ аҳамият бериш ва ресурс ажратишга даъват этувчи баёнот қабул қилди. Бугунги кунда Буюк Британия ва Германия ҳокимият идоралари ота-оналар ўзларига мўлжалланган махсус тренингларда қатнашишини таъминламоқда.
Аутизмга ташхис қўйиш лаборатория анализлари топширишни истисно қилади. Дўхтирлар ёш болаларнинг хатти-ҳаракатларини кузатиш ва ота-оналарининг хавотирларини тинглашдан келиб чиқиб хулоса қилади. Аутизм спектри ҳолатининг (ASD) жуда кўп аломатлари мавжуд. Айрим “спектрда”ги кишилар оғир руҳий хасталикларга чалинган бўлади. Бошқалари эса жуда ақлли бўлиб, мустақил яшай олади. Қўшма Штатлар ва Буюк Британияда терапевт сингари шифокорлар қуйидаги фактларни кўриб чиқади: а) чақалоқнинг 6 ойлик бўлганда кулиши; б) 9 ойлик бўлганда товуш ва юз ифодаларига тақлид қилиши; в) 12 ойлигида нималарнидир гапирмоқчи бўлиши ва г) ғайриоддий ёки такрорланаётган хатти-ҳаракатлари, кўзга тик қараш билан боғлиқ муаммолар ва боланинг одамлар билан муносабатлари. Агар булар бўлмаса, шундан сўнг баҳолашга киришилади. Бола бошқаларнинг ҳаракатларини тушунадими? У ёруғлик, шовқин ва ҳароратга сезгирми? Ухлаши ва овқат ҳазм қилишида муаммолар борми? Кундалик ҳаётидаги ўзгаришларни ёмон кўрадими? Махсус вебсайтларда қайд этилишича, бола аутизм спектрига тушиши учун иккита тоифа билан боғлиқ муаммолари бўлиши керак: 1) мулоқот ва ижтимоий муносабатлар билан боғлиқ муаммолар ва 2) хулқ-атворнинг чекланган ва такрорланган моделлари.
Жадал индивидуал аралашувлар, жумладан, хулқ-атвор, таълим ва психологик компонентлар аутизм ҳолатига ёндашувнинг энг самарали усулларидир. Ёндашувни эрта болаликдан бошлаш яхши натижага эришиш эҳтимолини оширади. Аутизм аломатлари ва белгиларини аниқлаш учун чақалоқ ва кичкинтойларни доимий тарзда текширтириб туриш муҳим аҳамиятга эга.
Ёндашув хулқ-атвор, коммуникатив терапия ва айрим аломатлар учун дориларни ўз ичига олади. Хулқ-атворнинг амалий таҳлилидан (Applied Behavior Analysis – ABA) кўпинча болага ижобий хул-атворни ўрганиш ва салбий хулқ-атворни камайтиришда ёрдам бериш учун мактаблар ва шифохоналарда фойдаланилади[3]. Бундай ёндашув кенг қамровли кўникмаларни ошириш учун қўлланишини мумкин, турли вазиятлар учун ҳар хил турлари мавжуд. “Floortime” деб аталган ёндашувда ота-оналар бола билан ўйнаш учун полга ўтириши ва у ёқтирган ҳаракатларни бажариши кўзда тутилади. У мулоқот ва ҳиссиёт билан боғлиқ кўникмаларни эгаллашида ёрдам бериш учун ҳиссий ва ақлий ривожланишни қўллаб-қувватлашга мўлжалланган. Яна бир ёндашувга кўра, болага кийиниш сингари кундалик кўникмаларни эгаллашида кўмаклашиш учун суратли карталар сингари визуал ишоралардан фойдаланиш лозим бўлади. У яхшилаб ўрганиши учун маълумотлар кичик босқичларга бўлинади.
Дислексияга ташхис қўйиш ҳақида гап кетганда, шуни қайд этиш лозимки, тиббий кўрик вақтида боланинг ўқиш ва ёзиш қобилияти, нутқи ривожлангани ва сўз бойлиги, мантиқий фикрлаши, хотираси визуал ва товушли ахборотни қайта ишлай олиш тезлиги, ташкилотчилик кўникмалари ва ўқиб-ўрганишга ёндашувлари текширилади. Бунда бир қанча таълим аралашувлари ва дастурларидан фойдаланилади. Улар ўқитувчилар белгилаб берган ишларни бажарадиган ва болага ўқишида кўмаклашадиган ёрдамчиси бор кичик гуруҳларда доимий ўқитишдан тортиб, мутахассис ўқитувчининг индивидуал дарсларигача қамраб олади. Буюк Британияда мактабга ушбу ишни бажариш учун қўшимча молиявий маблағ ажратилади. Болаларнинг таълим олишига компьютер дафтардан кўра яхшироқ ёрдам бериши мумкин. Бу катта ёшдаги болаларга тааллуқли.
Уйдирмалар
Ушбу соҳа дунёда нисбатан янги бўлгани учун ҳатто ривожланган мамлакатларда ҳам айни масалаларга оид уйдирмалар кўп учрайди.
1. Ўғил болалар ва қиз болалар
Баъзи кишилар ДЕГС, дислексия ва аутизм кўпроқ ўғил болалар ўртасида тарқалган деб ўйлайди. Бу нотўғри. Аслида ДЕГС ташхиси қўйилган қизлар кўпроқ эътиборсиз бўлади, шунинг учун улардаги ушбу ҳолатни аниқлаш қийин. Натижа: ташхис қўйилган ўғил болалар сони (13,2 фоиз) қизларга нисбатан (5,6 фоиз) кўпроқ. Қизларга баъзан умри давомида ташхис қўйилмайди ёки хавотир олиш оқибатида нотўғри ташхис қўйилади.
2015 йили Англиянинг катталарга хизмат кўрсатувчи Миллий аутистлар жамияти ёрдам бериб турадиган эркакларнинг аёлларга нисбати тахминан 3:1 бўлган. Умуман олганда, аутизмга чалинган қизлар ижтимоий вазият билан боғлиқ муаммоларни яхшироқ ҳал этади ёки аёллар билан қизлар қийинчиликларини яхшироқ ниқоблайди ёки кўздан яширади, яъни уларни бошқалар пайқамай қолиши мумкин.
Худди шу тарзда ўғил болаларга ҳам дислекия ташхиси қўйилади, лекин бу асосан болалар бундай ҳолатга тушишини англатмайди! Ўтказилган бир тадқиқотдан маълум бўлишича, эркаклар билан аёлларнинг дислексияга чалинган мияси айнан бир хил бўлмайди. Жоржтаун университети қошидаги Тиббиёт марказининг педиатрия бўйича профессори, доктор Г.Иденга кўра, дислексияга чалинган аёлларнинг мияси унга чалинмаган аёлларникидан фарқ қилади, яъни уларда эркакларнинг дислексияга чалинган ва чалинмаган мияси ўртасидаги фарқ бир хил эмас.
2. Гап озиқ-овқатдами?
Баъзи ҳолатларга озиқ-овқат таъсир этиши айтилади, аммо бу 100 фоиз исботланган эмас. Экспертлар аутизмга чалинган болалар учун бирорта муайян парҳезни тавсия этмайди, аммо тўғри овқатланиш зарур. Баъзан ASDга чалинган болалар ота-оналари аломатлар яхшиланишига ёрдам беришини кўрмоқчи бўлиб, глютен (дон таркибида бўладиган оқсилли елимшиқ модда) сингари нарсаларни уларга бермасликка ҳаракат қилади. Шунга қарамасдан, улар рационидан глютен билан казеинни (буғдой ва сут маҳсулотлари таркибидаги оқсиллар) олиб ташлаш аутизм спектри ҳолатида фойдали эканини аниқлайдиган етарли тадқиқот ўтказилгани йўқ. Бундан ташқари, сут маҳсулотлари сингари озиқ-овқат маҳсулотларини чеклаш суякларнинг тўғри ривожланишига халақит беради. Одатда аутизм спектри ҳолатига чалинган болалар суяклари ингичкароқ бўлади, шунинг учун суякларни мустаҳкамлайдиган озиқ-овқатларни истеъмол қилиш муҳим аҳамиятга эга. Ҳозирги кунда АҚШда тўғри парҳез ҳолат аломатларини енгиллаштиришини текшириш учун махсус овқатланиш дастурлари мавжуд.
ДЕГС билан боғлиқ ҳолларда шакар болаларни ўта тиниб-тинчимас қилиши ҳақидаги умумий тахминлар мавжуд, бироқ буни тасдиқлаш учун етарли даражада тадқиқотлар ўтказилган эмас. Аммо мувозанатланган ва тузук овқатланиш шакарни керагидан ортиқ истеъмол қилгандан кўра яхшироқдир. Бундан ташқари, ДЕГСга чалинган болаларнинг жисмоний машқлар билан шуғулланиши танада допамин моддасини соғлом тарзда кўпайтиргани учун ҳам фойдалидир. Аммо каттароқ ёшда кофеин сингари моддалар ҳам допаминни кўпайтиради, лекин унинг миқдори ҳаддан зиёд ошиб кетиши керак эмас – бу асабларни ўта қўзғатиб юборади.
3.Айб – тарбияда
Зикр этилган ҳолатлардан ҳеч бирининг на тарбияга, на қаттиққўл бўлишга ва ёки бола билан кўпроқ ишлашга дахли бор. Бола билан ўйнаш, тарбиялаш унинг таълим олишида қатнашиш сингари ёрдам беради, бироқ бу ҳолатлар генетика билан боғлиқ. Шу сабабли боланинг ота-онасини ҳеч қачон айбламаслик керак. Гиперактив, дислексик ва аутист болаларниг ота-оналари қўлидан келган ҳамма ишни қилади. Ота-оналар инсоннинг қандай туғилиши, мияси қандай ривожланиши ёки ишлашига таъсир кўрсата олмайди[4].
4. Уларнинг аксарияти ногиронлик эмас
Бу – шундай ва шу тариқа тан олиниши керак. ДЕГСга ташхис қўйилмаса ва тўғри ёндашув қўлланилмаса, бу ҳолат мактаб ва ишда, ўзаро муносабатларда қийинчиликлар туғдиради ҳамда спиртли ичимликлар ичиш, чекиш ва наркотиклар истеъмол қилиш билан ўзини “даволаш” сингари носоғлом уринишларга сабаб бўлади.
Аутизм ҳам ижтимоий муносабатлар ва дўст орттиришда муаммоларга олиб келади. Одамлар шовқин ёки бошқа чалғитувчи ҳолатлардан хафа бўлиши мумкин. Дислексия ҳам муаммоларни келтириб чиқаради. Ушбу ҳолатга чалинган болаларга эринчоқ, заиф ва бошқа шунга ўхшаш айблар тақалиши мумкин.
Ривожланган давлатларда учта ҳолатнинг барчасига ногиронлик деб қаралади ҳамда ҳолатлар оғирлигига қараб, уларга чалинганлар ижтимоий ёрдам олиш ҳуқуқига эга бўлади. Буюк Британияда болалар ўқишида ёрдам олиш учун махсус таълим эҳтиёжларини қоплаш мақсадида рўйхатга тиркалади. Айрим ногиронлиги бўлган болалар мактабларда ўқиши мумкин, ўқийди ҳам, айримлари эса ихтисослаштирилган мактабларга қатнайди.
5. ДЕГС, аутизм ва дислексияга чалинган, аммо муваффақият қозонган кишилар
Айрим ҳолларда қўйилган ташхиснинг ижобий жиҳатлари ҳам йўқ эмас. Масалан, ДЕГСга чалинган болалар қизиқувчан бўлади, бирор нарса ёқиб қолса, ўша нарсага диққатини ҳаддан зиёд жамлай олади ва креатив бўлади. Уилл Смит, Мишель Родригес ва Жим Кэрри сингари актёрлар, Жастин Тимберлейк ва Соланж Ноулз каби қўшиқчилар ДЕГС ҳолати аниқланган кишилардир. Олимпиада чемпиони Майкл Фелпснинг онаси унинг тиниб-тинчимас табиатини машҳур сузувчи бўлиши томон йўналтира билди.
Ижобий жиҳатлар билан боғлиқ аутизмнинг маъноси шуки, болалар айрим фанларга қаттиқ қизиқиб қолади ва ушбу муайян қизиқиши билан тенгдошларидан устун туради. Актёр Энтони Ҳопкинсга ва “Покемон” ўйини асосчиси Сатоши Тажирига Аспергер синдроми ташхиси қўйилган. Композитор ва пианиночи Мэтт Саваж 6 ёшга кирганида мусиқа чалишни мустақил ўрганди. Қўшиқчи Сюзан Бойл хам аутизмга чалинган аёл. Орландо Блум ва Том Круз сингари актёрлар ва катта эҳтимол билан Стив Жобс дислексияга чалинган кишилардир. Бундай кишилар нарсаларга ўзгаларга нисбатан бошқача қараши, яъни каттароқ манзарани кўриши мумкин.
Аммо барча ДЕГС, аутизм ва дислексия ташхиси қўйилган кишилар ҳам юксак меҳнат қобилиятига эга эмас, айримлари яшаш учун курашга ва кундалик кўмакка муҳтож. Айрим ҳолатлар жиддий бўлгани учун муваффақиятга эришиб бўлмайди.
“Оддий ҳолатлар” ҳақида. Келажакка назар
Руҳий ҳолатлар ва уни ногиронлик сифатида кўриш жаҳонда, ҳатто айрим ривожланган мамлакатларда ҳам нисбатан “янги” ҳисобланади. Бир куни дугонам самолёт бортига тезроқ чиқиб олиш учун аутизм ташхиси қўйилган ўғлининг бэджи – ҳужжатини кўрсатганда, Барселонадаги аэропорт ходимлари ногиронлик ҳар доим жисмоний ҳолат билан боғлиқ деб ўйлаб, югуриб бориб, ногиронлар аравачасини олиб келиб берган экан. Аммо Испанияда аутизм ва ДЕГС ҳолатларига чалинган болалар бемалол олий таълим олиши мумкин, бизда эса Фарҳод Ортиқбоев яқинда Фейсбукка жойлаган постида ёзишича, “аутизмга чалинган болалар махсус мактабларни битиргандан сўнг ҳатто университетларга ҳам кира олмайди”. У ушбу таҳлилий платформа билан алоҳида суҳбатда айтишича, болаларга мактабни битиргач, ҳамма оладиган аттестат берилмайди ва бу ҳужжат ҳатто коллежларга ҳам қабул қилинмайди.
‒ Бу камситишдан бошқа нарса эмас, чунки кўп болалар коллеж ва университетларда ўқиши мумкин, ‒ дейди Ф. Ортиқбоев.
UzAnalytics билан суҳбатда Самарқанд шаҳридаги “Ҳаёт” ННТ раҳбари Рано Халилова ҳам инклюзия[5] билан боғлиқ муаммолар ҳақида сўз юритди: “Европа Иттифоқи ҳомийлик қилган “Ўзбекистонда инклюзив таълим” лойиҳаси амалга оширилиб бўлгандан сўнг тажриба ўтказилган мактабга қабул қилинган болалар ўқишини давом эттирди, лекин мактабда уларга ҳеч ким қўшимча кўмак бермади. Мактабларда логопедлар, психологлар ва дефектологлар етишмайди, психолог бўлса ҳам, 2000 ўқувчига бир нафар шундай мутахассис тўғри келади”.
Аммо P.Халилованинг қўшимча қилишича, лойиҳа тугагандан сўнг раҳбарлар дунёқарашида ўзгаришлар юз берди. “Улар инклюзив таълим нима эканини билиб олди, OAB ҳам алоҳида эҳтиёжи бор болалар ҳақида аниқ нарсаларни ёза бошлади”. Албатта, Ўзбекистон ногиронлик ҳолатлари ҳақида кўпроқ нарсаларни билиб олиши, бошқа жамиятлардан кўпроқ ва ўзга стигмаларни бартараф этиши лозим. Давлат даражасида кўп ишлар қилиниши керак. Мутахассислар Ўзбекистонда асосан ота-оналар фарзандлари инклюзияси учун курашаётгани ҳақидаги фикрда якдилдир. Ҳукумат уларнинг овозини эшитиши зарур.
Бунинг нима аҳамияти бор? Воқелик бизга нейроранг-баранглик (neurodiversity) мавжудлигини шипшимоқда, бугун ҳатто оддий ўсмирларнинг ҳам хавотир ва ақлий сезгирлик даражаси баланд, шунинг учун дунё энди меъёр бўлмай қолган мураккаброқ ва турли-туман руҳий меъёрларга дуч келади. Келажакда дунё болалари ва катталари ўртасидаги ривожланиш янада нотекис бўлади. Компьютери ёки iPad’и бўлмаган қишлоқ болакайи ва 5 ёшида математика билан компьютерни биладиган Ғарбдаги шаҳар боласини тасаввур қилинг. Аммо шуни унутмаслик керакки, бугун гап нейроранг-баранглик ҳақида кетмоқда. ДЕГС, аутизм ва дислексия ҳолат сифатида автоматик тарзда даҳолик бўлмаса-да, фойдасиз эмас. Аслида улардан айрим ишларда жуда яхши фойдаланилади. Масалан ДЕГСга чалинганларга муносабатда ижодий ёндашув, аутизм эса роботлаштирилган схемаларда фойдали бўлади. Жамиятлар ғайриоддий кишиларнинг ушбу ресурсларидан фойдаланишни ўрганади ва уларни камситмайди, дея умид қиламиз.
___________________________________________________________________________________________________________________________________________
[1] Стигма (stigma) – бирор шахс ёки шахсларни маълум бир ҳусусияти учун яккалаб қўйиш.
[2] Ривожланган мамлакатларда ташхис қўйиш меъёрлари бир-биридан фарқ қилади. Масалан, баъзи сўров натижаларига кўра, Австралиядаги болаларни 11 фоизига шундай ташхис қўйилган. Буюк Британияда бундай кўрсаткич 3 фоиздан паст бўлган. Умуман олганда, АҚШда болаларнинг 11 фоизида ДЕГС ҳолати аниқланган, катталар орасида эса у ўсиб бормоқда.
[3] Фарҳод Ортиқбоев айтишича, Ўзбекистонда Applied Behavior Analysis амалиёти қиммат туради: “Давлат даражасида ёрдам берилмайди ҳисоби, чунки ушбу марказдан бошқа ҳеч вақо йўқ. Кичик хусусий болалар боғчалари ва мактаблар очилмоқда, аммо у эрда нархлар жуда қиммат ва буни ҳамманинг ҳам чўнтаги кўтармайди”. Умуман олганда, мутахассис мамлакатда “Тютор” (инглиз тилидан “tutor” – ёрдамчи ўқитувчи ёки репетитор дегани) тушунчаси йўқлигини тилга олади: “Болаларга ёрдамчи бўладиган инсон уларнинг олдида булиши шарт. Афсуски, бу ҳам йўқ. Шунинг учун аутизмга чалинган болаларга жуда қийин. Уларга далда ва таржимон керак. Тютор таржимон вазифасини бажаради ва ўқитувчи берган вазифани болага тушунарли тарзда етказади. Кўплаб ижтимоий кўникмаларни ҳам ривожлантиради”.
[4] ДЕГС ҳақида ҳам дунёда кўп тушунмовчиликлар бор. Мавжуд тадқикотларга қарамай, айрим одамлар (ҳатто олий маьлумотлилар ҳам) уни ҳалигача “бўлмаган” ҳолат деб ўйлайди ва бу синдромга чалинган болаларни “бетарбия” ва “жиннироқ” деб атайди. Аммо бу тарбияга боғлиқ эмас. Гиперактивлик кулгили ҳолат эмас, у миянинг одамнинг қулоқ солиш қобилиятига зарар келтирадиган бир хусусиятидир. Агар ушбу муаммо бўлмаганида, ДЕГС ташхиси қўйилмас эди.
[5] Инклюзия (ингл. inclusion – қўшиб олиш) – социумдаги барча фуқароларнинг тўла иштирокини ошириш жараёни. Инклюзив жамият ҳар бир инсон ижтимоий, иқтисодий, ирқий, жинсий, диний, ҳуқуқий, сиёсий, жисмоний, ақлий, фуқаровий ва бошқа барча хусусиятларидан қатъи назар, тўлақонли иштирокчиси бўла оладиган жамиятдир. Ҳар бир инсоннинг ўз хоҳиш ва иродасига кўра жамиятнинг барча қатламлари ҳаётида иштирок эта олиши инклюзиядир.
